曹Sir:明年料进入牛皮市

《信报》投资者笔记：......明年最大风险仍係美元动向，如美元继续偏弱，明年股市将反覆向上，反之亦然。估计明年美元仍未有条件加息，各位可留意电讯股及消费股，并相信台湾股市明年有较出色表现，尤其台湾银行股。我老曹投资策略自今年8月开始再次以保守先行。至于内地股市，今年4月起我老曹极之看好，但明年则有所保留，因为：一、中国M2已係GDP 192%，货币泛滥情况进入令人担心嘅水平；二、内地大城市楼价已係城市人均收入二十倍（或以上），响上述比重下，未来内地大城市楼价易跌难升；三、全球十大银行，中资已佔其三，情况有D似1989年12月日本嘅情况（中资银行在海外业务比重唔多，但目前市值却咁大）。今年股市狂升，係建基于两大因素 ︰1、睇好中国；2、睇淡美元。到咗出年，上述两大因素中长线仍啱，但短期可能面对调整。

船停泊在港口内係最安全，但上述唔係造船嘅目的，船必须扬帆出海经历风浪，然后安然无恙返回海港。资金亦一样，放在银行虽然安全，但唔係长远之计，因此我地必须留意各种资讯，并建立个人投资策略，一如船必须出海而唔係永远停留在港口道理一样。至于几时出海？请留意天气报告，更须明白小心驶得万年船嘅道理。去年海上风浪太大，资金都係留在银行好D；今年在各国政府量化宽鬆政策保护下，各位不妨出海；至于明年又到咗小心驶得万年船嘅日子，股市大幅反弹一年之后，通常进入牛皮市，嗰D受中东及东欧影响嘅银行股，各位宜暂时避开。

2005 年7月人民币开始缓步跑，即慢慢咁升值。不过自去年7月开始，人民币滙价一直维持在6.83兑1美元。由于今年3月至今，美元贬值15％左右，令中国出口产品在国际市场上重新恢复竞争优势，导致中国与美国、欧盟、印度等贸易伙伴磨擦加剧，甚至巴西、俄罗斯等亦加入不满人民币嘅行列。自1971年美元危机后，「三头马车」理论逐渐流行（当年係指德国、日本及美国；今天则指欧盟、中国及美国）。家吓各国外滙储备中，美元只佔62％，其餘係欧罗及日圆等，相信未来日子人民币将佔另一席位。

◎曹Sir金句
投资亦一样有时赢、有时输、有时略有损失，但不能全军尽墨。三十岁前要博，六十岁后要稳。年轻时资金少、智慧唔多，只有勇气多，因此要博；年纪大左、资金多左、智慧多左，反而勇气少左，因此要稳，因为已经输唔起。